По наградуваната книга за деца „Си беше еднаш“, писателката и уредничка Оливера Ќорвезироска и илустраторката Наталија Лукомска соработуваат на уште едно исклучително издание за деца – новата сликовница „Зорки и Цветка“. Книгата, која е во издание на „Либи“, дел од „Арс Ламина – публикации“, е актуелна приказна за пријателството и влијанието на модерната технологија во секојдневието на децата.
„Зорки и Цветка“ е сликовница на мошне актуелна тема: модерната технологија во секојдневието на децата. Се работи за пријателство помеѓу две сосем различни деца. Зорки е постојано внатре, тој живее во виртуелниот свет на мобилниот телефон, таблетот, компјутерот и телевизорот. Цветка, пак, е постојано надвор, таа живее во реалниот свет на сонцето, дрвјата, смеата и игрите, каде што со помош на една досетка (дрвена рамка) успева да создаде прекрасно детство без никакви ограничувања. Балансот помеѓу модерната технологија и стварниот, реален живот е претставен и на визуелно ниво, и преку обмислените илустрации на Лукомска: црно-белиот свет на модерната технологија се меша со колоритот на стварноста и на крајот сè се претопува во функционално единство, и за децата и за животот воопшто. „Зорки и Цветка“ е можно книжевно „решение“ за корекција на светот на децата таков каков што, за жал, е.
Оливера Ќорвезироска (1965) е родена во Куманово. Основно и средно образование завршила во родниот град, а Филолошки факултет во Скопје, каде што живее и работи како уредник. Автор е на следните книги: „Трети кат“ и „Високите бели“ (поезија); „Кифличката Мирна“ и „Мојот брат од тринаесеттиот кат“ (романи за деца); „Дедо Миле“ (сликовница); „Отвораат ли сништата работа“, „Еден Текст и една жена“ и „На полпат“ (критика и есеистика); „Заклученото тело на Лу“, „Аб’т“ и „Три Марии“ (романи за возрасни); „Страдањата на младиот лектор“, „(С)плетени раскази“, „Две перници“, „(Со)шиени раскази“, „Новелички без шеќер“, „Улиците што ги нема“ и „Престапни години“ (раскази за возрасни). Застапена е во дваесетина антологии на современиот македонски расказ, објавени дома и во странство. Нејзините раскази се преведувани на англиски, француски, унгарски, албански, чешки, српски, бугарски, словенечки, полски, руски, германски и грчки јазик. Повеќекратен добитник е на значајни награди за расказ во Македонија, а за „Сплетени раскази“ во 2003 година ја има добиено наградата за најдобра проза на Друштвото на писателите на Македонија „Стале Попов“. Член е на ДПМ и на Македонскиот ПЕН-центар.
Наталија Лукомска е полска илустраторка и графичка дизајнерка, која живее и работи во Скопје. Има дипломирано на Шлезискиот универзитет во Катовице, полонистика и славистика, каде што го има изучувано македонски јазик. Во Македонија има дојдено како професор по полски јазик на Катедрата за славистика на Филолошкиот факултет „Блаже Конески“ во Скопје.
Денеска, се занимава со илустрирање и графичка обработка на книги и дизајн на постери, црта детски книги, дизајнира корици, соработува со издавачи и културни институции во Полска и во Македонија. Досега има илустрирано 20-ина книги за деца. За нејзините илустрации има добиено повеќе награди. Предава полски јазик и преведува книги.
Покрај „Зорки и Цветка“, во издание на „Либи“, дел од „Арс Ламина – публикации“, со нејзини илустрации досега се објавени и книгите „Си беше еднаш“ (приредувач Оливера Ќорвезироска), „Ши, ѕифри, копчи“ од авторот Владимир Лукаш и „Ремек-дело“ на Дејан Алексиќ.
Сликовницата е достапна во сите поголеми книжарници и онлајн преку www.literatura.mk.