Во пријатната атмосфера на библиотеката „Тане Георгиевски“ во Куманово, во присуство на бројни млади читатели и ученици од основните училишта, денеска (7 ноември 2019) беше промовирана книгата „Јас сум Миа“, од популарната домашна авторка Јана Мишо. Промоцијата беше проследена со дискусија со авторката на теми опфатени во книгата, дилеми и ситуации со кои се соочуваат денешните тинејџери. Следуваше неформално дружење со Мишо и потпишување книги.
„Јас сум Миа“ е еден од најчитаните наслови за млади оваа година. Книгата која е во издание на „Арс Ламина – публикации“, уште пред својата официјална промоција, која се одржа за време на 31. издание на Саем на книгата во Скопје, беше најбарана, пред сѐ од младата, тинејџерска публика. Приказната за Миа почна со колумните на Јана Мишо објавени на Хаштаг.мк (hashtag.mk) продолжи со првиот роман „Јас сум Миа“, и секојдневно расте преку социјалните мрежи и во комуникацијата со обожавателите. Почна како интернет-сензација со епизоди, а се развива во комплетно книжевно дело. „Јас сум Миа“ е трета книга на Јана Мишо, по „Скоро парижанка“ и „Анаис од Монмартр“ и првo нејзино издание за тинејџери.
Приказната се одвива околу тинејџерката Миа, чија симпатија е Стефан. Но, Стефан има девојка! И не можете ни да замислите каков проблем е тоа. Поточно, тоа ти е најголем проблем, додека некој тајно не те сними како правиш беља… И не го покаже тоа на интернет. Фино е да бидеш популарна онлајн, ама дали е фино секаде да те препознаваат и да знаат што си направила? И тинејџерски проблеми, и другарки и другари и љубов и… мала мистерија.
Книгата е достапна во сите книжарници на „Литература.мк“: на улицата „Македонија“, во ТЦ „Рамстор“, „Скопје сити мол“, „Веро Центар“, во Градскиот трговски центар ‒ Скопје и во Битола на ул. „Широк Сокак“ бр. 40, а може да се нарача и онлајн, преку literaturа.mk.
