Книгата за млади „Јас сум Миа“, од популарната домашна авторка Јана Мишо, ќе биде промовирана во библиотеката „Тане Георгиевски“ во Куманово, на 7 ноември (четврток) со почеток во 12 часот.
Промоцијата ќе биде збогатена со интерактивен дел, разговор на теми опфатени во книгата, прашања од публиката, потпишување книги и дружба со Јана Мишо.
„Јас сум Миа“ е еден од најчитаните наслови за млади оваа година. Книгата која е во издание на „Арс Ламина – публикации“, уште пред својата официјална промоција, која се одржа за време на 31. издание на Саем на книгата во Скопје, беше најбарана, пред сѐ од младата, тинејџерска публика. Таа беше и најпродаваниот наслов на штандот на „Литература.мк“ и „Арс Ламина“ за време на саемот.
Приказната за Миа почна со колумните на Јана Мишо објавени на hashtag.mk продолжи со првиот роман „Јас сум Миа“, и секојдневно расте преку социјалните мрежи, и во коминикацијата со обожавателите. Почна како интернет-сензација со епизоди, а се развива во комплетно книжевно дело. „Јас сум Миа“ е трета книга на Јана Мишо, по „Скоро парижанка“ и „Анаис од Монмартр“ и првo нејзино издание за тинејџери.
Приказната се движи околу тинејџерката Миа, чија симпатија е Стефан. Но, Стефан има девојка! И не можете ни да замислите каков проблем е тоа. Поточно, тоа ти е најголем проблем, додека некој тајно не те сними како правиш беља… И не го покаже тоа на интернет. Фино е да бидеш популарна онлајн, ама дали е фино секаде да те препознаваат и да знаат што си направила? И тинејџерски проблеми, и другарки и другари и љубов и… мала мистерија.
Книгата е достапна во сите книжарници на „Литература.мк“: на улицата „Македонија“, ТЦ „Рамстор“, „Скопје сити мол“, „Веро Центар“, во Градскиот трговски центар ‒ Скопје и во Битола на ул. „Широк Сокак“ бр. 40, а може да се нарача и онлајн, преку literaturа.mk.
Книгата ќе биде достапна за продажба и по претставувањето во библиотеката, по промотивна цена од 200 денари.
