Издавачката куќа „Арс Ламина“ ќе биде дел од саемот на книга во трговскиот центар „Рамстор“, што ќе трае од 16 до 20 декември и ќе може да се најде широк избор на дела со попусти до 50 отсто. Дел од понудата се изданија за сечиј вкус и возраст како бестселери, книги за деца, дела од домашни автори и многу други.
По намалени цени може да се најдат голем број странски дела како: „Мојата автобиографија“ од легендата во фудбалот, Сер Алекс Фергусон; „Фајронт во Сараево“ од д-р Неле Карајлиќ; „Е, баш ме заболе“ од Марк Менсон; „Моите изуми“ од Никола Тесла; „И така, ви велам…“ од познатиот монтипајтоновец Џон Клиз; „Љубов во време на колера“ од Габриел Гарсија Маркес, „Лето како во Мама Миа“ од Ени Робертсон итн. Дела од домашни автори, исто така ќе бидат достапни на попуст, меѓу кои „Јас сум Цако“ од Александар Матовски-Цако и „Спортски стории: записи, настани и сеќавања“ од познатиот македонски спортски новинар Зоран Михајлов.
Од литературата за деца на штандот на „Арс Ламина“ ќе може да се најдат многу интересни изданија за најмалите како што се сите делови од серијалот за Исидора Мун, двата дела од „Приказни за добра ноќ за бунтовни девојчиња“, „Малиот Стјуарт“ и многу други.