„Ако сакате да летате, морате да се ослободите од тоа нешто што ве задржува долу“- Тони Морисон.
Американска писателка, добитничка на Нобеловата награда за литература, Тони Морисон почина во понеделникот (5 август 2019 г.) на 88-годишна возраст.
Авторката, чие вистинското име е Клое Ентони Вофорд, е родена на 18 февруари 1931, Лорен, Охајо, САД. Во 1953 година завршила на универзитетот „Хауард“, а во 1965 година била уредничка во книгоиздаваштвото „Рендом Хауз“ во Њујорк. Од 1989 година била професорка по хуманитарни науки на Пристонскиот универзитет, Њу Џерси.
„Молчењето ни било долго и длабоко“, вели Морисон. Барајќи ја врската меѓу сегашноста и минатото, Морисон раскажува за ликот на Афроамериканците, принудени да ги поднесуваат ужасите на ропството и ексцесите на расизмот. Била членка на Американската академија за уметност и литература.
Како писателка Морисон дебитирала со романот „Најсиното око“ (1970). Авторка е на уште пет романи, меѓу кои се „Песна на Соломон“ (1978), „Љубена“ (1987), за кој доби Пулицерова награда, „Џез“ (1992), „Рај“ (1997), „Дом“ (2012), „Господе, помогни му на детето“ (2015) и други. Таа е првата афроамериканска добитничка на Нобелова награда за литература, која ја доби во 1993 година за романите што се одликуваат со поетски талент и ја опишуваат суштествената страна на американската реалност.
Извор: vulture.com