На свеченото доделување на традиционалните годишни награди на Друштвото на писателите на Македонија (ДПМ), авторот и професор Зоран Анчевски ја прими наградата „Ацо Шопов“ за најдобра збирка поезија за 2023 година, за книгата „Коњски житија“, која е во издание на „Арс Ламина“. На настанот што се одржа на 18 септември во ДПМ, видно возбуден и почестен од признанието, Анчевски се заблагодари што ја добива наградата за ова дело.
„Би сакал да му се заблагодарам на Друштвото на писателите, кое смогна сили да ја продолжи традицијата за доделување на овие значајни награди. Благодарен сум и на жири-комисијата, што во една ваква, силна конкуренција, најде вредност повеќе во мојата книга, за да ми ја додели оваа за мене многу значајна награда – „Ацо Шопов“. И, секако, големо благодарам на издавачката куќа „Арс Ламина“, која ја публикуваше оваа поема во едно навистина убаво издание и што се погрижи книгата да има прекрасна промоција“ – рече Анчевски.
За наградата „Ацо Шопов“ одлучуваше жири-комисијата во состав: Елена Пренџова (претседателка) и членовите Снежана Стојчевска и Зоран Јакимоски.
„Коњски житија“, исто така, е добитник на наградата „Григор Прличев“ за најдобра поема во ракопис во 2022 година. Во делото се опеани најпознатите коњи од фолклорот, историјата и културата, од античко до денешно време, од Кантака – коњот на Сидарта (потоа Буда), па сè до коњот од стриповите за Таличниот Том… Коњите раскажуваат во прво лице, за своето време, за своите јавачи и сопственици… Истовремено, авторот нашол начин како нивните искази да бидат релевантни за денешницата. Така, има низа теми што сè уште нè засегаат сите, критика на аномалиите на општеството, екологијата и друго.
Венко Андоновски во поговорот на книгата вели: „Постојат дела што дури откако ќе се појават и ќе станат единица мера за жанрот и за книжевноста, во нас предизвикуваат студен страв што се изразува со прашањето: ’Како сме можеле да живееме без ова дело досега?‘ Такви дела се ’Тешкото‘ (Конески), ’Пиреј‘ (Петре М. Андреевски), ’Црнила‘ (Коле Чашуле), ’Диво месо‘ (Горан Стефановски), ’Дениција‘ (Петре), ’Света песна‘ (Анте)… Такво дело за мене е и поемата ’Коњски житија‘ на Зоран Анчевски. Бравурозно и неповторливо. Единица мера за оние што доаѓаат во македонската книжевност, без разлика дали сакаат да галопираат или да каскаат низ неа… ’Коњски житија‘ е вистински дијамант на нашето поетско творештво“.
Во финалниот избор за наградата „Ацо Шопов“, покрај „Коњски житија“, беше и стихозбирката „На врв на јазикот“ од Катица Ќулавкова , исто така издание на „Арс Ламина“. Во конкуренција за наградата „Ванчо Николески“, што ДПМ ја доделува за најдобра книга за деца и млади, беше сликовницата „Рокчето“ од Никола Маџиров.
Поетската книга „Коњски житија“, која е во издание на „Арс Либрис“, дел од „Арс Ламина – публикации“, е достапни во сите поголеми книжарници и онлајн преку www.literatura.mk.
