Опис
Леополд Седар Сенгор е сенегалски поет, политичар, културен теоретичар и исклучително популарен претседател на својата родна земја во двете децении меѓу 1960 и 1980 година. Прв Африканец избран за член на Француската академија, Сенгор е општопризнат како најзначајниот африкански интелектуалец на 20 век. Сенгоровата поезија е раскошна и вдахновена, алузивна и интимна – поради што го привлекува вниманието не само на експертите и критичарите туку и на најобичниот љубител на убавиот збор. Автор на чудесната Црна жена – преку која, заедно со другите Песни од темнината станува познат во целиот свет – Сенгор е препознатлив по своите расплинети витмановски стихови низ кои оживуваат дивите убавини на црниот континент, легендите и верувањата, обичаите и сензибилитетот на живите современици и одамна умрените прародители од неговиот роден крај.
