Опис
Иако релативно неодамна откриен надвор од границите на Бразил, Хозе Марија Мачадо де Асис важи за еден од најголемите светски автори од XIX век, и тоа токму поради оние нешта што првично влијаеле негативно на неговиот статус: предвеснички модерен и смело експериментален придонес кон наративната форма и техника. Делата на Мачадо де Асис се препознатливи по своето песимистичко гледиште на човековата природа и софистицираните психолошки согледувања. Урбан, космополитски, резервиран и циничен, Мачадо ги игнорира општествените прашања, како бразилската независност и укинувањето на ропството, и се концентрира на сликање на внатрешни портрети на ликови фатени во грч со животот. Таков е случајот и со „Дом Касмуро“, фиктивен црнохуморен мемоар на еден љубоморен маж и недоверлив раскажувач, чиј лежерен и шегобиен тон е сопоставен на трагиката на неговата судбина.
