Книгата „Каде што шумата се среќава со ѕвездите“ е прекрасна, човечка приказна напишана од авторката Гленди Вандера која нè потсетува дека понекогаш мора да погледнеме подалеку од врвовите на дрвјата кон ѕвездите и да дозволиме да влезе светлина во нашите животи. Делото веќе е преведено на македонски јазик во издание на „Арс Либрис“, дел од „Арс Ламина – публикации“ и може да се најде во сите книжарници „Литература.мк“ или да се нарача онлајн на www.literaturа.mk
Романот беше ставен на листата на бестселери на „Вол Стрит Журнал“ и на „Вашингтон Пост“. Ова неверојатно дебитантско дело е за мистериозно дете кое успева да научи двајца странци како повторно да сакаат и да веруваат.
По губењето на мајката и борбата со ракот на дојка, Џоана Тил продолжува со истражување на птичјите живеалишта во Илиноис што ги почнала во текот на дипломските студии. Решителна во намерата да докаже дека неволите не ја скршиле, работи од утро до мрак. Нејзината осаменичка рутина е прекината кога пред вратата на нејзината колиба ќе се појави босоного дете, целото со модринки.
Девојчето, кое се претставува како Урса, тврди дека е пратена од ѕвездите да посведочи за пет чуда. Џо, загрижена за детето, ѝ дозволува да остане со неа – барем додека не ја открие вистината за нејзиното минато.
За да ја реши мистеријата со заскитаното девојче, Џо бара помош од својот повлечен сосед Габриел Неш. Оваа необична тројка ќе изгради цврста емоционална врска, но како што се ближи крајот на летото, сите нивни болни тајни излегуваат на површина, а нивните судбини се препуштени на ѕвездите.