Издавачката куќа „Арс Ламина“ ја продолжува својата мисија за поттик на читачките навики кај најмладите и поддршка на културните манифестации. На неодамна одржаното 57. издание на Детски Рацинови средби во Велес, донираше над 50 книги, романи за деца, читанки и енциклопедиски изданија. Книгите беа доделени на најуспешните ученици-учесници на осум литературни и ликовни конкурси, како и натпревари за ИКТ-проекти.
Детски Рацинови средби, што се одржува во чест на поетот и револуционер Коста Солев Рацин, е најмасовната и најстарата книжевна манифестација за деца и млади во Македонија. Оваа година се одржаа голем број книжевни настани, едукативни работилници, книжевни работилници, спортски игри и безброј натпревари во рецитирање, ораторство, литературни и ликовни конкурси, ИКТ-проекти, изработка на стрип, дебата и друго. На настанот и на конкурсите учествуваа ученици од целата држава, но и од Хрватска и Србија.
Седмоодделенката Донка Китанова од ООУ „Вера Циривири-Трена“ од Скопје, под менторство на Ана Кралевска, ја доби највисоката Гран при награда на меѓународниот поетски конкурс на 57. Детски Рацинови средби. Првата награда во меѓународниот литературен конкурс ја освои деветоодделенката Даниела Теова од ООУ „Васил Главинов“ од Велес со ментор Каролина Попова. Таа се закити и со втора награда на ликовниот конкурс под менторство на својата професорка Снежана Стефановска. Првата награда по литературниот конкурс за средношколци ја освои Клара Ѓуровска од СУГС Гимназија „Јосип Броз Тито“ од Скопје под менторство на професорката Елена Неделковска.
На ликовниот конкурс во категорија средношколци првата награда и златен пехар ја освои Драгана Минова од СОУ „Кочо Рацин“ од Свети Николе со ментор Биљана Трајанова, а кај основците со првата награда и златен пехар се закити Ива Илиев од ООУ „Васил Главинов“ од Велес со ментор Снежана Стефановска.
Беше доделена и награда за ИКТ-проекти од предметна настава за прво место за ментор на Тодорка Карамичева од ООУ „Кирил и Методиј“ од село Стојаково, Општина Богданци. Беа доделени и награди за најдобра режија, видеообработка, сценографија, костимографија.
Прва награда за групна ликовно-поетска творба за одделенска настава добија Зорица Адамчевска и Јулијана Нацева од ООУ „Блаже Конески“ од Велес.
Во рамките на 57. Рацинови средби се одржаа и рецитаторски и ораторски натпревари, а за кои исто така беа доделени награди.
Организатори на 57. Детски Рацинови средби се МДПС „Премиера“ Општина Велес и Локалната библиотека „Гоце Делчев“.
Честитки за сите наградени и за организаторите!
